ضل.. وصدى..وشتات

مفتتح

عن الاسود والابيض الغير محايد مطلقا
ولجل خاطر الورد البلاستيك
والقلب اللى شايف طراطيف الوجع

وبعد السؤال ما بينطرح
الجواب بيكرر فى نفسه
كعرض لمواهبه فى الملل

فيجوز كون المختصر مش دايما هو المفيد

----------------------------

نفس البنت
اللى بتخبى ضلها جوه الحكاية
وبتستخبى من صدى ضحكتها ع المراية
لساها بتحاول تصدق
إن الموت من التعب
يفرق بشكل مستبعد
عن الموت م السكات

بس الأهم
إن النتيجة المحبطة
هتكون عبارة عن سكة واحدة
موشومة بنقش متكرر م الوجع
فهتفضل البنت تتشتت
فيرد ضل طراطيفها الحنين ع السؤال
إن الألم هو الأمل
نفس الحروف
نفس التشتت والعبث
بس الرك ع التصاريف