الثلاثاء، 17 يوليو 2012

أهل الروح- وكأنك من دمى

  • مش عارف ليه بتونس بيكى وكأنك من دمى"
"
كل ما أسمع الأغنية دى بيجى اسمها فى بالى ،
برغم انى بحمد ربنا على رزقه ليا بنعمة الأصدقاء اللى اقربلى من اهلى
بس هى بتفضل ليها مكانة تانية
يمكن السر فى حنيتها وقلبها النقى جدا
استمتاعى قوى برجوعى لطفولتى وهى معايا رغم انى انا الأكبر

بس مش كده
مش هى دى الاجابة

فى يوم زى النهاردة فى بداية شهر يوليو 2010 كانت اول مرة اشوفها
وبدون اسباب مقنعة حسيت جوه نفسى انها اكتر حد بستريحله فى المكان كله
كان صعب عليا وقتها الاحظ ده.
الموقف كان كله جديد عليا  والدوامة اللى كنت لسه خارجة منها ومن عالم انغمست فيه حتى النخاع بس ما قدرتش
اضحك على نفسى وانتميله
وزى كل الحواديت اللى بتدور عن علاقات الكائنات البشرية ببعضها
دارت الايام ما بين حلو ومش حلو اوى ودايما كانت جنبى  بوجودها وافعالها، بس كانت جوا قلبى بروحها


لغاية ما جه المر

بس وجودها حلاه


لما بنفقد حد بنحبه بيبقى الوجع ما يتوصفش
لكن الاصعب لما اللى بتحبهم هما اللى يتوجعوا ويحسوا بالفقد ده
  • "فى قلوب ما تستاهلش الوجع"

قبل كده كان ضميرى بيعذبنى عشان ما بقدرش ادارى عنها وجعى زى ما بعمل مع الناس ، كنت وما زلت بحس انى بستنزف مشاعرها.
بس دلوقتى شعورى بالعجز بقى اكبر
ما بملكش غير محبتى ودعواتى


" لو كان ليا دعوة نبى ، ماكنتش هسأل ربنا غير انه يحرم قلبها من الوجع"
بس انا مش نبى
" لو المعجزات بتتحقق بالأمانى، ما كنتش هتمنى غير انى احول محبتى لدوا لحزنها"

بس زمن المعجزات انتهى



فى النهاية ما يفضلش غير انى اكرر شكرى للخالق انه رزقنى محبتك
والح فى دعوتى انه سبحانه زى ما جمع بين قلوبنا فى الدنيا، يجمع ارواحنا تحت ظل عرشه

الثلاثاء، 10 أبريل 2012

من غير ما تفهم

 "ذرة سكر فى الفنجان
قالت الرحمة م الرحمن
لما بدوب م الحب فى نوره
روحى تشبع أى جعان"
*1
------------

مين اللى قال
إن فاقد الشئ لا يعطيه
طب ده اللى بتضيع منه حاجة
هو أكتر من يعرف قيمتها

_____________________
"إزاى بتعرف تبقى بلسم للجراح
مع إن جرحك لسه حى
مع إن عتمة دنيتك علقم
بتعرف تبقى ضى"
 *2
---------
كنت دايما أبصلها بإستغراب  ساعات كتير بيوصل لدرجة الإنبهار
هى إزاى كده
هشة وصلبة
خايفة وفى نفس الوقت بتشع امان
وليه ماتقدرش تعيش من غيرى ؟ مع إنى مجرد نتيجة لحسبة هى اساسها والمعطيات!
يا ترى الجزء هو اللى محتاج ينتمى للكل؟ ولا الكل هو اللى بيعتمد ع الجزء عشان يتمتع بشعور الكمال
_____________________________________
"أنا لسه يارب بحطة ايدك ع المسرح
أنا لسه بحاول أستوعب ف طبيعة الدور"
*3
-----------
 دماغك مش راضية تبطل تفكير
ميت الف سؤال مالوش إجابة
قلبك مش راضى يبطل يتوجع
بجروح كتير مش لاقيالها سبب
بتدمعى وتبصى للسما
يارب نفسى اتدفى بالاجابات
وحدك قادر ع المعجزة
فبيبعتلك ملاك
انتى اللى بتضحكيه فبيفرحك
وانتى اللى بتحميه فيطمنك
__________________________
1-رباعايات فى حب الله د.نبيل خلف وأداء منير
2-إسراء مقيدم"لساك دفا"
3- مصطفى إبراهيم

الخميس، 15 مارس 2012

مرسال للجاي

شباك ع الروح بيطل


ولإن العتمة محاصراها
والقلب  الأخضر عطشان للضى

ولإن الضى عزيز وبلاده بعيد
فماكانش بإيدهاغير انها تفتح

شباك يمكن  منه الضى يهل
اصل الشباك على روحها كان بيطل

................................


" وأهل الروح فى نور الله ولو غمضت بعرفهم"

رباعيات فى حب الله

----------------------------------
بعد التحية والسلام:
من انسانة ما تملكش غير شوية ضى فى عينيها وشوية محبة فى قلبها
اعرفك بنفسى
يمكن ما بيربطش ما بينا دم
لكن حبيتك من وانت فكرة
وبحلم باللحظة اللى هشوفك فيها
مش عارفة بحبك اوى كده ليه

يمكن لانك عايش جوا قلب اكتر مخلوقة ربناا زرع محبتها فى قلبى
يعنى انت اخو روحى
لانها ماما روحى
ومامتك  فى نفس الوقت

ماتستغربش اصل اختك الكبيرة مش شبه الناس
وعمرها ما قدرت تقيس المحبة بصلة الدم

كل اللى تعرفه انها بتحبك اوى
وهتفضل تحبك اوى اوى

حتى لو عمرها ما شفتك او حتى عرفت اسمك

المرسال ده ليك
مش عارفة ممكن تفهمه او تشوفه امتى
المهم عندى
انك تعرف قد ايه بحبك وبحب الانسانة اللى انت حته منها


امضاء:
زينب
فى يوم من ايام حياتى الدبلانة