جمعية خطف السيناريستات

وكأن العالم قد شارف على الخلاص وتم العثور على الحلول السحرية لكافة مشاكل البشرية المعذبة

وحلت الرفاهية العالم وارتفعت معدلات الملل والاكتئاب

ولم يعد ينقصنا سوى الساسبنس

ان ان اه ه

ها قد جاء فرسان الدراما المصرية على أعناق تنانينهم المجنحة

ولمن لا يعرفهم أقول هم جنس بشرى أوشك على الانقراض لأن الباقى منهم بيضرب فى التحرير والاتحادية  وبيثبته سواقين التكاتك ع الدائرى

ويتغذون على حبر المطابع وإنتاج روايات مصرية للجيب

غالبيتهم دكاترة وصحفيين شديدى الملل وقلاشين وعايشين فى حالة شبه دائمة من النوستاليجا والاستماع لانتاج التسعينات

المبهر من أغانى الوكمان وأمانى وأغانى

السؤال الوجودى حالا

انتم مالكم؟؟

هتعرفوا

بصفتى كائن فضائى يرفض التدخل فى الشأن الداخلى لهذا الكوكب المزرى

فتعرضت لاتهامات مجحفة من الرفاق فى السفينة الأم اللى مش لاقية راكنة بإنى خنت اتفاقية السلام المزمعة وابتديت أتدخل

مثلا

بقيت أحاول أخمن أسامى البيه يوسف الشريف فى اسم مؤقت

أما الجريمة الشنعاء

فإنى بتفرج على الـ3 إعادات لنيران صديقة وبحاول اتفذلك هل نور هى شريهان ولا لا

الخلاصة

إن السفينة الأم فكستلى عشان مش لاقية راكنة زى ما إنتم عارفين

وشكلى هلبس المهمة الاستطلاعية دى 

إلى الأبد وحتى تحترق النجوم يا عينيا

فمن هذا المنطلق قررت التالى

تأسيس جمعية أهلية غير هادفة للربح عاملة على كشف السر وقتل الساسبنس وإعادة الهدوء للعالم

وأولى المهام

خطف الكائنات الأرضية المعروفة ب

محمد سليمان عبد المالك/ أو الملك حسب الأخطاء المطبعية

ونظيره محمد أمين راضى من مشجعى الهضبة

وإجبارهم على تسليم نسخ السيناريو وحكى آخر حلقة فى الإنجاز

وفى حالة الرفض

سنستخدم سلاحنا السرى الأقوى

عرض مسلسل فاطمة بأجزائه كلها مرة واحدة بدون قطع أو إعلانات وإجبارهم على مشاهدته وكتابة ملخصات الدبلجة

فهل من متطوعين؟؟

Game over

ما كانش فى غير إختيار من الإتنين
كإجابة على سؤال أى حد بيشوفنى سرحانة إمبارح
ويقولى :انتى مالك؟؟

إما إنى أشاركهم برحلة العذاب السيزيفى مع المصالح الحكومية

والقلش المعتاد عن خططى لقتل مدام إبتسام وتفجير مبنى التأمينات

وتحولى لمواطنة عندها شيزوفرينا

بنوتة رقيقة بتشتغل فى الكتب والشعر والإذاعة وبتحب القطط والفراشات وبتضحك فى وش صحابها الصبح"

 "وباليل قاتلة محترفة من فرسان النينجا بتطارد كل موظفى التأمينات وبتقتص منهم

 

ها

لسه ما ضحكتش؟ 

!!!!!!!!!!

 

خلاص ممكن أشاركك بالمشهد التخيلى لمدام ابتسام وهى متشعلقة من الدور السادس

وعمالة تقوللى"لالالالالالالالالالالا مش هموت تيلاوقتى إلا لما أمضتى إنصيراف الأول"

طبعا ضحكت

معقولة .. لسه ماتهتش وبتدور على الإجابة فى عينى؟؟؟؟

 Bravoooooooooooo

 

كده إنت تستاهل تقابل الوحش

تستاهل أرمى فى وشك كل هواجسى وظلامى النفسى

تستاهل أقولك إنى خايفة منك ومنى ومنهم ومن حتى القطط بتاعتى

إنى مش عارفة أنام وبشوف كل اللى أعرفهم وما عرفهمش

إنى حاسة إن ضهرى للهوا

وطول الوقت مش عارفة الضربة الجاية من فين ومين وإمتى

إنى شايفة إن أسبوع مدى زمنى مبالغ فيه لأى حاجة

إنى حاسة إن حتى فلوسى متغرقة بالدم

 

ها

لسه ما عيطتش

لسه ما إتخضتش وقمت وسيبتنى

 

woooooooooooooooow

 

إنت رائع

أهنيك

كده إستحقيت وعن جدارة ما أقولكش

 

game over

الأهم إنك تستحق تعرف

إنى برغم كل اللى فات

لسه ثابتة

وجذورى بتمد وبتسيب علامة فى أى أرض

حتى الأراضى البور بتدوقها الخضرة ولو لثوانى

أغنى لسه عيشة وبحلم وبتحرك

ومش هستسلم

ولحد القيامة

مش هرمى الفسيلة وهزرعها
 

 وشكرا للمتابعة

أزرق\رمادى

رؤية

------

عن الأبواب المواربة

النهايات المعلقة

أوهام اللانهائية المصطنعة

والمزيد من المساحات الرمادية

هناك

على مرمى لم تطأه البصيرة

نهر التيه الذى يجرف مطاردى السراب

وأنا

دوما

سريعة الهرب والعطب

أفلت من مطاردة عبدة الرمادى

أنا

كاهنة الأزرق

وسيدة المعارك التى لم يقدر لها الحسم ختام

2

فلاش معتم

--------

ألات التصوير كاشفات للكذب

لم أتعلم خداعها بعد

وحدها تكشف ما بالداخل

وحدها ترى الأزرق

  وتجبر كاهنته على الإبتسام

صوت ع الورق

 1

صوت ع الورق" إقرأه واسمعه 

 اليوم
أولى الخطوات نحو الحلم
اليوم أشاركك أيها الصديق إنطلاقة "صوت ع الورق" فى عالمنا الموازى
كلماتك وكلماتي
صوتي واذانكم
لحظات دونت بالكلمات والأصوات

اليوم .. تجتمع نصوص لم تنشر من قبل
والرابط الوحيد الذى يجمع بينها هو الإحساس

"صوت ع الورق" هو أول كتاب صوتى وإلكترونى من تجميعى
وعسى أن يصير الحلم واقع

 ---------------------------

2

صوت ع الورق" "تقرأه

الحق ما ستمر عليه عينك فيما يلى من سطور
أيها القارئ العزيز
هل رأيت صوتا مسطورا من قبل؟
هل سمعت همس علامات الترقيم ونهنهات الفاصلات والنقاط وغيرها ؟
هل سبق لك أن حاولت التعرف على الحاسة التى تخاطب قلبك مباشرة
إنها الحروف أيها العزيز
التى وجدت قبل البدء ذاته
بين يديك فقرات لا يجمع بينها سوى الإحساس
إحساس من تكتب لك هذه الكلمات الأن بأن مايلي يشبهها ويشبهك
لا أخفيك سرا قارئى العزيز
إننى فى حياة إفتراضية أخرى
كنت صوت اللا مكان
كانت الأشجار والفراشات والحمائم ينقلن لى أسرار البشر
ويطالبننى بإختراق تلك الكائنات الرخوة القابعة فى اليسار منهم
لبث بعض دفء الكون فيها
ولم أجد سوى الأذان والعيون معبر
إذا كان الأثير قد نقل لك إحساسى تلك الحروف
فالأن موعد أن تدلي عيناك بدلوهما فى هذا الشأن
إفتح النوافذ المطلة على روحك و دعها تستنشق الإحساس بلا رقيب

دمت حيا وإنسانا
زينب فرحات

وحبك مقرون بأنفاسى

إلا وحبك مقرون بأنفاسى

إلا وحبك مقرون بأنفاسى

"
الحق ما أقول
أنا أحب خالقى ولا كذب
أنا أدرك ذلك حتما

"فأرحم قلوبا نال منها شحوبا"

تلك النبضات التى تتقارب
الدموع المنسابة وحدها
 
" أهيم فى لقياه... كيف وصاله"

أحبك ياربى ولا كذب
هذا اليقين بمحبتى
هذا اليقين بثباتها
لم يهتز منذ وجدت

"هل يا ترى يرضى وكلي عيوب"

ضغوط\وجع\شكوك\إشمئزاز\سقوط
إلا المحبة ..مستحيلة التزعزع
قبل البدء وجدت
وبعد الختام ستظل

"مدد ستى الكريمة أم العواجز مدد"

يختار الأحبة
ويمهل الظالمون
والقلب لم يعرف النقمة قط
القلب لا يعرف سوى أن يزداد محبة لخالقه

" هل يا حبيب فى رضاك نصيب؟"

اللهم فأرض عمن لم يعرف عنك سوى محبتك
اللهم فأحبه

بيد الغياب

صغيرتك لم ترحل يا أمى
صغيرتك صادقت الغياب
علها تدرك يوما ما
سر جاذبيته
لا أخفى عليك سرا يا أمى
صغيرتك تغار من الغياب
لن تدعه يسلبها المزيد من الأعزاء
هذه المرة هى من ستزور الغياب
ربما تكشف سره
ربما تمنعه من زيارة الأحبة
هذه المرة يا أمى ستكون بيد صغيرتك
لا بيد الغياب

مرسال للي راح قبل الوصول

    بعتنا الجواب للى راح

    وكتبنا المرسال للى جاى

    ومفضلش من دوشة وجعنا

    الا شوية حروف

    جم من نصيب اللى راح

    من قبل اما يجى معاد الوصول

---------------------------------------

العزيز "العصبى"

بتصدق فى رسايل السما؟

أنا بصدق جدا وهحكيلك على دليل

إمبارح كنت غايبة من الشغل وتعبانة جدا

بس اصحابى أصروا إنى لازم انزلهم

الغريب انى نزلت وسط البلد قبلهم

قعدت مع نفسى بستغل الوقت فى محاولة للتدوير على اجابة مقنعة عن السؤال المعتاد

مالى؟

لأنى متنحة جدا فكتبت فى الاجندة ، والكلام كان بالنص:

"لو التاريخ بيكرر نفسه ،فمعايا بيتغابى وبيوجع ، كل مرة ببقى أجبن من اللى قبلها"

ليه حاسة ان "المناضل" و"الرزينة"و"المهذب" هيتحولوا للجزء الجديد من فيلم "المغترب"و"المتفائلة"و"العصبى" ؟؟

وليه مرعوبة من ده؟؟

وصلت لقمة الجبن والتناقض

عايزاهم موجودين ومش عايزاهم

أبطال الفيلم القديم وصلت لحالة إن نصى بيكرههم ونصى بيحبهم

كل محاولاتى للاحتفاظ بيهم تحت أى مسمى فشلت

مش مهم سبب الفشل

المهم إنها فشلت

وبقيت حاسة إنى ملعونة ،وإن مجرد ما بحس بالأمان لازم اتوجع

طب هو الحل يعنى انى اقطع علاقتى بكل الناس؟

مش عايزة أتعلق بـ"المهذب"

ومش عايزاه يبقى الاخ اللى بحلم بيه

مش عايزة استريح لحنية "المناضل" وأحس انه ضهرى

مش عايزة أحب "الرزينة"

وأخطط معاها لفرحها وأسامى ولادها

نفس الكلام بسمعه

اللى كنت بتنشق على ربعه دلوقتى مش طايقة كله

كل اللى حواليا واثقين إنهم بجد ومشاعرهم مش مزيفة

كمان انا دلوقتى اقوى ومش معتمدة عليهم تماما

ما بقتش مكسورة ومضغوطة زى الأول

بس بقيت جبانة

مستنزفة لدرجة مخليانى مش قادرةأحب حد

إفتكرتك جدا

امبارح بس فهمت كل تصرفاتك اللى كانت بتجننى

إفتكرت لما سألتنى :"هو انتى ليه ما ظهرتيش وانا عندى 21 سنة؟"

لاقتنى بقول "للمناضل": هو انتوا ليه ما ظهرتوش بدرى؟؟

"المناضل" قرا اللي فى الاجندة

وقام باس راسى فى وسط القهوة

شعور غريب

مبسوطة ومش طايقة نفسى

حسيت إن مجرد وجودهم فى حياتى وثقتى فى حبهم دى بتضغطنى جدا

فهمت أنا قد ايه بضغط عليك

فهمت حكمة ظهورك فى الوقت ده

وافتكرت قصيدة بتقول" كان عارف ان الدنيا بتبدل نعمة بتانية خلته ما يخافش الخدش"

مش هسيب نفسى لغاية ما كل طاقة الحب اللى جوايا تخلص وتتبدل بخوف

ومش هبطل احب اللى حواليا واديهم فرصتهم

بس برده مش هعتبرهم مسكنات

مش هحطهم فى أدوار ثابتة فى دماغى لانهم مش حجارة شطرنج

والأهم

إقتناعي بإن مش دايما كل حاجة حلوة بتسعدنا

مش هفضل موجودة فى حياتك واضغطك

لمجرد انى مش مقتنعة انى مؤذية

شكرا لكل لحظة كنت موجود او مش موجود فيها

شكرا لانك العصبى .. العزيز

**************

ملحوظة:

الرسالة الأصلية أرسلت بتاريخ الثانى من يناير فى العام نفسه

ولم ينتظر المرسل الرد الذى لن يبعثه المرسل إليه قط

 

كقوة الموت

الحق ما أبلغتنى يا حكيم
والصدق ما تسمعه منى الأن
المحبة جنة يا حكيم
لكن الأحباء هم الجحيم عينه
حامل روح ما اصاب حين قال

  "المحبة قوية كالموت"
 

وأنا
لمسة الموت الباردة أذبلت روحى يوما ما
لكن الروح إبتهلت سائلة النضارة
أما لمسة المحبة
فقد سلبتنى صلاوتى
وهى تميت وتحيى كل الأيام

المشاعر شئ عظيم..المشاعر شئ سخيف.. المشاعر متعبة